ప్యాకేజీ ఫుడ్‌పై కొత్త బాదుడు?

అత్యవసర వస్తువులు ముఖ్యంగా ప్యాకేజ్‌లో అమ్మే ఆహార పదార్థాల ధరలు భారీగా పెరగనున్నాయి. ఈనెలాఖరులో సమావేశం కానున్న జీఎస్టీ కౌన్సిల్‌లో జీఎస్టీ స్లాబులను మార్చే అవకాశముంది. ఇపుడు అయిదు శాతం కేటగిరిలో ఉన్న అన్ని వస్తువులను 8 శాతం కేటగిరి వస్తువులతో కలిపాలన్న ప్రతిపాదన చర్చకు రానుంది. ఇపుడు జీఎస్టీలో పన్నులు నాలుగు స్లాబుల్లో వేస్తున్నారు. దీన్ని హేతుబద్ధీకరణ అనే ముసుగులో జీఎస్టీ భారం పెంచేందుకు మంత్రుల కమిటీ వేశారు. కేటగరీలను నాలుగు నుంచి 3కు తగ్గించాలని ఈ కమిటీ సిఫారసు చేయనున్నట్లు సమాచారం. మార్చిన తరవాత ఇపుడున్న నాలుగో కేటగిరి కాస్త మూడో కేటగిరి కిందికి వస్తుంది. పొగాకు ఉత్పత్తులు, విలాస వస్తువులు ఈ కేటగిరిలో ఉంటాయి. వీటిపై 28 శాతం జీఎస్టీ వేస్తున్నారు. ఇవి పోగా ఇపుడున్న స్లాబులు 5శాతం, 12 శాతం 18 శాతం. 5 శాతం జీఎస్టీని 8 శాతానికి పెంచి రెండో స్లాబు చేస్తారు. అలాగే 12 శాతం స్లాబులో ఉన్న వస్తువులను 18 శాతం జీఎస్టీలోకి తీసుకెళారు. అంటే విలాస వస్తువులు మినహా మిగిలిన అన్ని వస్తువులు, సేవలపై జీఎస్టీ 8 శాతం లేదా 18 శాతం ఉంటుందన్నమాట.
భారీగా ఆదాయం
స్లాబులను ఈ విధంగా మారిస్తే ప్రభుత్వానికి భారీగా ఆదాయం పెరగనుంది. అత్యవసర వస్తువులపై జీఎస్టీని 5 శాతంనుంచి 8 శాతానికి పెంచడం వల్ల ఏటా అదనంగా రూ.1.50 లక్షల కోట్ల ఆదాయం వచ్చే అవకాశం ఉందని మంత్రుల బృందం నివేదికలో పేర్కొన్నట్లు తెలుస్తోంది. అతి తక్కువ పన్ను శ్లాబును 1 శాతం పెంచితే అదనంగా రూ.50 వేల కోట్ల ఆదాయం సమకూరుతుందని అంచనా. అత్యధికంగా వాణిజ్య సేవలు, వస్తువులు 12 శాతం స్లాబుల్లో ఉన్నాయి. వీటిపై ఏకంగా ఆరు శాతం పెంచి, 18 శాతం చేస్తే… ప్రభుత్వానికి మరింత ఆదాయం సమకూరనుంది. మరి ఈ ప్రతిపాదనలకు జీఎస్టీ కౌన్సిల్‌లో అన్ని రాష్ట్రాలు ఆమోదిస్తాయా లేదా అన్నది చూడాలి.