బ్యాంక్ CEOగా గరిష్ఠంగా 15 ఏళ్ళే
ఏదైనా ఒక కమర్షియల్ బ్యాంక్లో మేనేజింగ్ డైరెక్టర్ అండ్ చీఫ్ ఎగ్జిక్యూటివ్ (CEO) ఒకే వ్యక్తి 15 ఏళ్ళు మించి ఉండటానికి వీల్లేదని రిజర్వ్ బ్యాంక్ ఆఫ్ ఇండియా (ఆర్బీఐ) వెల్లడించింది. ఈ మేరకు కొత్త నిబంధనలను ఇవాళ ప్రకటించింది.కొత్త నిబంధనలు వెంటనే అమల్లోకి వచ్చాయి. అలాగే హోల్ టైమ్ డైరెక్టర్గా కూడా అంటే మూడు పదవుల్లోనూ ప్రమోటర్ లేదా ప్రధాన వాటాదారుగా ఉంటే… అతను/ఆమె 12 ఏళ్ళకు మించి ఉండటానికి వీల్లేదని స్పష్టం చేసింది. అసాధారణ పరిస్థితుల్లో ఈ కాలపరిమితిని 15 ఏళ్ళకు పొడిగించవచ్చని, అయితే దీనికి ఆర్బీఐ అనుమతి తప్పనిసరి అని స్పష్టం చేసింది. ఒక బ్యాంకులో 15 ఏళ్ళ పాటు CEOగా ఉంటే… మూడేళ్ళ కూలింగ్ ఆఫ్ పీరియడ్ తరవాత మళ్ళీ అతను/ఆమె ఆ పదవి చేపట్టవచ్చు. అయితే మూడేళ్ళ కూలింగ్ ఆఫ్ పీరియడ్లో ఆ బ్యాంక్ లేదా దాని అనుబంధ సంస్థలలో ఎలాంటి పదవులు నిర్వహించరాదు. అలాగే ప్రైవేట్ బ్యాంక్లో ఈ పదవికి గరిష్ఠ వయోపరిమితి 70 ఏళ్ళు కొనసాగుతుందని… అవసరమైతే బ్యాంకుల బోర్డులు ఈ వయో పరిమితిని తగ్గించుకోవచ్చని పేర్కొంది.