టాటా స్టీల్ … అంచనాలు తప్పాయి
సెప్టెంబర్‌తో ముగిసిన త్రైమాసికంలో టాటా స్టీల్ కంపెనీ నిరుత్సాహకర పనితీరు కనబర్చింది. ఈ త్రైమాసికంలో కంపెనీ కన్సాలిడేటెట్ నికర లాభం రూ. 1,514కోట్లుగా నమోదైంది. గతేడాది ఇదే త్రైమాసికంలోని నికర లాభం రూ. 11,918కోట్లతో పోలిస్తే 87శాతం తక్కువ. నికరలాభం భారీగా క్షీణించినా.. కంపెనీ ఆదాయం స్థిరంగా ఉంది. జూన్‌తో ముగిసిన త్రైమాసికంలో టాటా స్టీల్ నికర లాభం రూ. 7,764.96కోట్లుగా ఉంది. మూడు నెలల క్రితం నికర లాభంతో పోలిస్తే ఈసారి నికరలాభం 80శాతం తగ్గింది. జులై- సెప్టెంబర్ త్రైమాసికంలో టాటా స్టీల్ ఆదాయం మాత్రం కేవలం 0.8శాతం తగ్గి రూ. 59,877.52 కోట్లకు చేరింది. గతేడాది ఇదే త్రైమాసికంలో కంపెనీ ఆదాయం రూ. 60,387.13కోట్లు. టాటా స్టీల్ కన్సాలిడేటెడ్ నికర లాభం రూ. 3000కోట్లు, ఆదాయం రూ. 56,900కోట్లుగా ఉంటుందని మార్కెట్‌ నిపుణులు అంచనా వేశారు. తాజా ఫలితాలు నికర లాభం విషయంలో అంచనాలను తప్పాయి. ఇవాళ సమావేశమైన టాటా స్టీల్ బోర్డు.. 7 లిస్టెడ్, అన్లిస్టెడ్ కంపెనీలను సంస్థలో విలీనం చేసే ప్రతిపాదనను ఆమోదించింది. మరోవైపు ఇవాళ టాటా స్టీల్ షేర్ ధర దాదాపు స్థిరంగా రూ. 101.10 వద్ద ముగిసింది. క్రితం ముగింపుతో పోలిస్తే షేర్ ధర 0.49శాతం నష్టపోయింది.
