ఆర్‌ఆర్‌ఆర్‌ ఎన్‌ఎఫ్‌టీల విడుదల
మల్టిప్లెక్స్ కంపెనీ పీవీఆర్‌ తమ వ్యాపారంలో కొత్త పోకడలకు శ్రీకారం చుడుతోంది. తొలిసారి ఆర్‌ఆర్‌ఆర్‌ నిర్మాతతో డీల్‌ చేసుకుని.. తమ థియేటర్‌ పేర్లను పీవీఆర్‌ను కాస్త పీవీఆర్‌ఆర్‌ఆర్‌గా మార్చింది. మార్కెటింగ్‌ ఇదొక కొత్త ఎత్తుగడ. ఇపుడు ఆ నిర్మాతతో కలిసి ఎన్‌ఎఫ్‌టీ(నాన్‌ ఫంజిబుల్‌ టోకెన్స్‌) మార్కెట్‌లోకి ప్రవేశించింది. తొలిసారిగా భారతీయ సినీ ప్రేక్షకులకు ఆర్‌ఆర్‌ఆర్‌ మూవీ కలెక్షన్లను గెలుచుకునే అవకాశాన్ని పీవీఆర్‌ కల్పించింది. డీవీవీ ఎంటర్‌టైన్‌మెంట్‌, పీవీఆర్‌ సంయుక్తంగా ఈ డిజిటల్‌ ఎన్‌ఎఫ్‌టీలను ప్రేక్షకులకు అందుబాటులో ఉంచనుంది. ఎస్‌ఎస్‌ రాజమాళి, జూనియర్‌ ఎన్టీఆర్‌, రామ్‌చరణ్‌, అలియా భట్‌ సంతకం చేసిన పోస్టర్లు, సినిమాలో వాడిన పలు వస్తువులతో సహా దాదాపు 300పైగా ఎన్‌ఎఫ్‌టీలు అందుబాటులో ఉండనున్నాయి. ఈ డిజిటల్‌ కలెక్షన్లను పీవీఆర్‌ నిర్వహించే పోటిలో వీటిని ప్రేక్షకులు సొంతం చేసుకోవచ్చునని పీవీఆర్‌ ఒక ప్రకటనలో వెల్లడించింది. వాస్తవానికి ఈ సినిమా ఆధారంగా ఆరు భిన్న రకాల ఎన్‌ఎఫ్‌టీలను ప్రవేశపెట్టింది. ఇందులో రెండు పోస్టర్స్‌. వీటిపై రాజమౌళి, ఎన్టీఆర్‌, రామ్‌చరణ్‌, ఆలియా భట్‌ సంకాలు ఉంటాయి. మిగిలిన నాలుగు ప్రాప్స్‌. ఇవి సినిమాలో వాడిన బైక్‌, కాయిన్‌, రెండు ఆయుధాలు. ఈ ఆరు ఎన్‌ఎఫ్‌టీల నుంచి 50 కలెక్టబుల్స్‌ ఉంటాయి. దీంతో మొత్తం 300 ఎన్‌ఎఫ్‌టీలను మింట్‌ చేశారు. పాత చిత్రాలను కూడా ఎన్‌ఎఫ్‌టీ కలెక్షన్ల రూపంలో అందించేందుకు సిద్దమని పీవీఆర్‌ జాయింట్ మేనేజింగ్ డైరెక్టర్ సంజీవ్ కుమార్ బిజిలీ చెప్పారు. ఈ మేరకు హాలీవుడ్, బాలీవుడ్‌లకు చెందిన అయిదారు సినిమా స్టూడియోలతో చర్చలు జరుపుతున్నట్లు తెలిపారు.
