రూ.450 కోట్లతో ‘అపర్ణా’ కొత్త ప్రాజెక్ట్‌
హైదరాబాద్‌లో పేరొందిన నిర్మాణ సంస్థ అపర్ణా కన్‌స్ట్రక్షన్స్‌ కొత్త ప్రాజెక్టును ప్రకటించింది. కొంపల్లి వద్ద ‘అపర్ణా కనోపీ ఎల్లో బెల్స్‌’ పేరుతో కొత్త నివాస గృహాల సముదాయాన్ని నిర్మిస్తున్నట్లు ప్రకటించింది. 10.5 ఎకరాల్లో నిర్మిస్తున్న ఈ ప్రాజెక్టులో 1,050 అపార్ట్‌మెంట్‌లు ఉంటాయని అపర్ణా కన్‌స్ట్రక్షన్‌ డైరెక్టర్‌ రాకేష్‌ రెడ్డి తెలిపారు. పది టవర్లను నిర్మిస్తున్నాం.. ఒక్కో టవర్లో 15 అంతస్తులు ఉంటాయి. రూ.450 కోట్ల వ్యయంతో ఈ ప్రాజెక్టును చేపట్టినట్లు చెప్పారు. కంపెనీకి ఇది 59వ రెసిడెన్షియల్‌ ప్రాజెక్టు. ‘కనోపీ ఎల్లో బెల్స్‌’ నిర్మాణం 2025 మార్చి నాటికి పూర్తవుతుందని తెలిపింది.
ఈ ఏడాది తమ కంపెనీ 25వ వార్షికోత్సవం జరుపుకుంటోందని, ఈ సందర్భంగా అన్ని మార్కెట్లను ఆకర్షించే విధంగా విస్తరణ ప్రణాళిక చేపట్టామని రాకేష్‌ రెడ్డి అన్నారు. 6 కోట్ల చదరపు అడుగుల ప్రాజెక్టులు నిర్మించాలని లక్ష్యంగా పెట్టుకున్నామని అన్నారు. తమ పోర్టుఫోలియోలో 59 ప్రాజెక్టులు ఉన్నాయని అన్నారు. తెలంగాణ, ఆంధ్రప్రదేశ్‌తో పాటు కర్ణాటకలో మధ్య, చిన్న తరహా పట్టణాలకు విస్తరించాలని నిర్ణయించామని ఆయన అన్నారు.
