భువనగిరిలో ఏజీఐ గ్లాస్‌ప్యాక్‌ కొత్త ప్లాంట్‌
హెచ్‌ఎస్‌ఐఎల్‌ లిమిటెడ్‌ చెందిన ప్యాకేజింగ్‌ ప్రొడక్ట్స్‌ డివిజన్‌ ఏజీఐ గ్లాస్‌ప్యాక్‌… తెలంగాణలోని భువనగిరిలో కొత్త ప్లాంట్‌ను ఏర్పాటు చేసింది. స్పెషాలిటీ గ్లాస్‌ డివిజన్‌ కోసం రూ.400 కోట్ల పెట్టుబడితో నెలకొల్పిన ఈ ప్లాంట్‌ ఉత్పత్తి కార్యకలాపాలు ప్రారంభించింది. బ్యూటీ ప్రొడక్ట్స్‌ ఉపయోగించే ప్రత్యేకమైన గ్లాస్‌ ఉత్పత్తులను ఈ ప్లాంట్‌లో కంపెనీ ఉత్పత్తి చేయనుంది. ఈ ప్లాంట్‌ ఉత్పత్తి సామర్థ్యం రోజుకు 154 టన్నులు. ఈ ప్లాంట్‌లో ఉత్పత్తి చేయనున్న గ్లాస్‌ ఉత్పత్తులను ప్రధానంగా కాస్మోటిక్స్‌, ఫెర్‌ఫ్యూమ్స్‌, ఫార్మాస్యూటికల్స్‌ ఉత్పత్తులు, ప్రీమియం స్పిరిట్స్‌లో ఉపయోగిస్తారని కంపెనీ తెలిపింది. ఈ ప్లాంట్‌ ఏటా 10 శాతం వృద్ధితో రూ.250 కోట్ల ఆదాయాన్ని ఆర్జించవచ్చని అంచనా వేస్తున్నట్లు కంపెనీ పేర్కొంది. భువనగిరి ప్లాంట్‌ ద్వారా 350 మందికి పైగా ఉద్యోగావకాశాలు కల్పించనున్నట్లు కంపెనీ వెల్లడించింది.
