అయోమయంలో ఆర్‌బీఎల్‌ బ్యాంక్ భవిష్యత్తు
మరో ప్రైవేట్‌ బ్యాంక్ సంక్షోభంలో పడింది. బ్యాంక్ సీఈఓ రాజీనామా పెద్ద విషయం కాదని బ్యాంకు వర్గాలు అంటున్నా… ఆర్‌బీఎల్‌ వ్యవహారం ఇపుడు మార్కెట్‌లో హాట్‌ టాపిక్‌గా మారింది. ఏదైనా బ్యాంక్ 5 శాతం కంటే ఎక్కువ వాటా కొనాలంటే ఆర్బీఐ అనుమతి అవసరం. ఆర్‌బీఎల్‌ బ్యాంక్‌లో పది శాతం వాటా కొంటామని రాకేష్‌ ఝుఝున్‌ వాలా, ఆర్‌కే దమాని ఆర్బీఐకి లేఖ రాశారు. ఆర్బీఐ ప్రస్తుతం ఈ ప్రతిపాదనను పరిశీలిస్తోంది. ఆర్‌బీఎల్‌ బ్యాంక్‌ను మరింత పటిష్ఠ పర్చడంతో పాటు బ్యాంక్‌కు గట్టి నాయకత్వం తెచ్చేందుకు ఆర్బీఐ ప్రయత్నిస్తోంది. ఈ ఏడాది ఆరంభంలో రూ.274 వద్ద ఉన్న ఈ బ్యాంక్ షేర్‌ ఇపుడు రూ.173 వద్ద ట్రేడవుతోంది. ఈ నేపథ్యంలో ఐసీఐసీఐ సెక్యూరిటీస్‌ ఈ బ్యాంక్ షేర్‌ను అమ్మాలని సిఫారసు చేస్తోంది. బ్యాంక్ రుణాపలై అనిశ్చితి ఉందని ఈ సంస్థ పేర్కొంది. ప్రస్తుతం ఈ బ్యాంక్ నుంచి వస్తున్న నెగిటివ్ అంశాల కారణంగా ఈ బ్యాంక్ షేర్‌ రూ. 130కి పడిపోయే అవకాశముందని ఐసీఐసీఐ సెక్యూరిటీస్‌ పేర్కొంది. అయితే ఇన్వెస్టెక్‌ అనే బ్రోకింగ్‌ సంస్థ ఆర్‌బీఎల్‌ బ్యాంక్ షేర్‌ను కొనుగోలు చేయమని సలహా ఇస్తోంది. ఈ సంస్థ అంచనా ప్రకారం ఈ షేర్‌ రూ. 295ను చేరే అవకాశముంది. మొత్తానికి ఈ బ్యాంక్ వ్యవహారం బ్యాంకింగ్‌ రంగంలో హాట్‌ టాపిక్‌గా మారింది.
