KGF2… తొక్కుకుంటూ పోతోంది…
హిందీ, హిందీయేతర భాషల మధ్య ఇటీవల జాతీయ స్థాయిలో గొడవ జరుగుతోంది. పైగా సినిమా తారల మధ్య. అందులోనూ… ప్రముఖ హీరో అజయ్‌ దేవగన్‌కు కన్నడ హీరోలకు మధ్య. ఈ గొడవల నేపథ్యంలో నిన్న అజయ్‌ దేవగన్‌ నటించిన రన్‌వే 34, టైగర్‌ ష్రాఫ్‌ నటించిన హీరోపంతి 2 సినిమాలు విడుదల అయ్యాయి. కేజీఎఫ్‌ – చాప్టర్‌ 2 నాన్‌స్టాప్‌16వ రోజు థియేటర్లలో నడుస్తోంది. ఈ మూడు సినిమాల నిన్నటి కలెక్షన్స్‌ చూసి బాలీవుడ్‌ దిమ్మతిరిగి పోయింది. హిందీ భాష వద్దని అంటూనే హిందీలోకి ఎందుకు డబ్‌ చేస్తున్నారన్న అజయ్‌ దేవగన్‌ మూవీ రన్‌వే 34 ఓపెనింగ్స్‌ రూ. 3 కోట్లకు లోపే ఉంది. కొన్ని మీడియా సంస్థలు రూ.3.5 కోట్లు అంటున్నా… మెజారిటీ ట్రేడ్‌ వర్గాలు కలెక్షన్స్‌ రూ.2.5 కోట్ల నుంచి రూ. 3 కోట్ల మధ్య ఉంటుందని అంచనా వేస్తున్నారు. ఈ మూవీలో అమితాబ్‌ కూడా నటించారు. ఇక హీరోపంతి 2 మూవీ రూ. 6 కోట్ల ఓపెనింగ్‌ను సాధించింది. బాలీవుడ్‌ స్టాండర్డ్స్‌ ప్రకారం ఈ రెండు సినిమాలు ఫ్లాప్‌ అయినట్లే. రంజాన్‌ పండుగ సందర్భంగా వచ్చే సెలవుల్లో రన్‌వే 34 రాణిస్తుందన్న నమ్మకం పరిశ్రమలో కన్పించడం లేదు. హీరోపంతి2.. కలెక్షన్స్‌ పెరగవచ్చని అంటున్నారు. అయితే కేజీఎఫ్‌2 శుక్రవారం రూ.4.25 కోట్లు వసూలు చేసి రూ. 350 కోట్ల మార్క్‌ను దాటింది. 16వ రోజు కూడా ఈ స్థాయి కలెక్షన్స్‌ సాధించిన కేజీఎఫ్‌2 ఈ వారాంతంలో మరింత భారీ కలెక్షన్స్‌ సాధించే అవకాశం ఉంది. ఈద్‌ కలెక్షన్స్‌ యశ్‌ మూవీకే వస్తాయని ఇండస్ట్రీస్‌ వర్గాలు భావిస్తున్నాయి. నిన్నటితో మొత్తం రూ. 353.06 కోట్ల కలెక్సన్స్‌ సాధించిన కేజీఎఫ్‌ రూ.400 కోట్ల వైపు పరుగులు పెడుతోంది.
